కైమా కబాబ్

కావలసిన పదార్ధాలు :-
కైమా పావు కిలో
లవంగాలు మూడు
ఏలకులు రెండు
దాల్చినచెక్క రెండు
ఉల్లిపాయలు రెండు
అల్లం ఒక్క అంగుళం
గసగసాలు టీ స్పూన్
సెనగపప్పు టేబుల్ స్పూన్ (పుట్నాల పప్పు)
వెల్లుల్లి ఆరు రేకులు
కారం టీ స్పూన్
నూనె ఒక్క కప్పు
కోడిగ్రుడ్డు ఒక్కటి
పచ్చి మిర్చి రెండు
గట్టి పెరుగు అరకప్పు
తయారు చేయు విధానం :-
కైమా కడిగి, అందులో ఒక ఉల్లిపాయ కోసి, ఉప్పు, కారం, మసాలా ముద్ద ( ఎలక్కాయ, లవంగాలు, దాల్చినచెక్క, అల్లం వెల్లుల్లి )వేసి ఒక పావుగ్లాస్ నీరు పోసి నీరంతా ఇగిరేవరకు ఉడకనివ్వాలి. గసగసాలు, సెనగపప్పు తో కైమా కూడా మెత్తగా మిక్సి లో రుబ్బుకొని కోడిగ్రుడ్డు వేసి బాగా కలపాలి. పచ్చి మిర్చి, ఉల్లిపాయ సన్నగా ముక్కలు కోసుకొని, పెరుగులో కలిపి నాననివ్వాలి.(పెరుగు గట్టిగా ఉంటే మంచిది).

నూరిన కైమాని, చిన్న చిన్న ఉండలుగా చేసి దాన్ని అరచేతిలో పెట్టి కొంచెం పలుచగా చేసుకొని వాటిమీద పెరుగుతో కలిపెట్టుకున్న ఉల్లిపాయ, పచ్చిమిర్చి మిశ్రమాన్ని ఒక్క స్పూన్ వేసి దానిమీద రెండో ఉండతీసుకొని నెమ్మదిగా నొక్కుతూ అతికించాలి . తరువాత బాణలిలో నూనె పోసి బాగా కాగానిచ్చి అందులో ఒక్కటి ఒక్కటి వేసి దోరగా వేపుకోవాలి. ఇంక మీ కైమా కబాబ్ రెడీ అయినట్లే!!